Ey çarh-ı keçrev bes değil midir
Yere batırdın şöhret ü şânım
Târ u mâr edüp âr u vârımı
Harâb eyledin hân u dükkânım

Gülbün-i güzel gül-gülistânı
Gönlümü vîrân eyleyen dilber
Mey-i la’linden âb-ı zülâlin
Câmını vermiş nazlı civânım

Dûd-i âhımı eylemiş hem-râh
Rûz u şeb dâim zâr u giryânım
Arş-ı a’lâya azm-i rậh edüp
Her seher gider tîr-i efganım

Cân atar cânım cânân iline
Dâmen-i cânân düşe eline
Milk-i ademde devlet-i câvid
Bahş ede câna mîr-i mîranım

Ey kerem-pîşe merhamet eyle
Der-i dergâhın âsitânına
Yüz yere koyup intizâr eden
Afv eder elbet şân-ı Sultânım

Metn-i derûnum şerhini yaza
Zer-kalem ile nice bin kâtib
LUTFÎ’ye yâ Rab olmaz mı birgün
Perde kaldıra rûy-i cânânım