Bir zamân ola ki bizden dahi bu eyyâm geçe
Ne nişân u ne eser kala ne hod nâm geçe

Kalavuz kuru yer altında niçe bin meh ü sâl
Anca subh ola yine anca dahi şâm geçe

Kim asâyiş ola anda yâhud kim kıla karâr
Çü Süleymân u Sikender geçe Behrâm geçe

Ne yaman egleniser bunda ne hod yahşi velî
Devlet anınla gelüp bu ‘âleme hoş nâm geçe

‘Ömre mağrûr olup aldanma ki nâgâh geçiser
Ne kadar eğlene bir nesne ki mâdâm geçe

Hurumâtdan çek elin olmaya yirin zulümât
Ola mı in’âma ehil şol ki ke’l-en’âm geçe

Göresin ‘âlemi bir türlü dahi renge döne
Gide tertîb ü düzen bayık u hengâm geçe

Devşirüp renc ile ol mâlı hasîs olma beğim
Yiyeler körlüğüne dem gele eyyâm geçe

Görün ol hâce-i mağrûru becid dünye kovar
Niçe bir Mısr’a gide yâ niçe bir Şâm geçe

Ne tahayyür gerek ey Ümmî bu çarhın işine
Niçe kim saġ ola baş anca serencâm geçe