Ben bu cihâna irfâna geldim!
Bulmağa kenzi virâna geldim!
Cümle mevcûdât kulluk ederler,

Bendelik için Sulthana geldim!
Bir katre sudur çün benim aslım,

Sun’-u Hakk ile bu şâna geldim!
Ana rahmine bir nutfe düştüm,

Durub dokuzay bu hâna geldim!
Türlü meşakkat çektim bu handa,

Terbiye için zindana geldim!
Bu ne san’at kim bir damla sudan,

Yapdı ol Üstâd bu şâna geldim!
Cümle mahlûka olmuşum mir’ât,

Sırr-ı pinhânı tıbyâna geldim!
Esti başımda aşk rûzigârı,
Andelib-âsâ efğâna geldim!
Geldiğim gibi giderim âhir,
Pes iki üç gün mihmâna geldim!
Marifet tahsil eylemek için,
Sıdk ile râh-ı merdâna geldim!
Boynuma takdım tabla-i aşkı,

Satmağa onu alana geldim!
Tâlib olanlar bana gelsinler,
Çünki ben ta’lim-i ihvâna geldim!
Bildiğim mikdar ilm öğredirem,

Hasbeten lillah ihsâna geldim!
Aşkı istersen ol zikre meşğul,
Ben de zikr ile bu kâna geldim!
Dünya ve âhiret âşıka perde,
Attım kamûyu Rahmâna geldim!
Der ki Kuddûsî geçtim sivâdan,

N’eylerim gayrı Yezdâna geldim!