İçmişiz hamrı “sekâhüm” den ebed mestâneyüz
Olmuşuz dem-beste zincîrin sürer dîvâneyüz

Şem’-i vaslın pertevine hû deyüp atdık teni
Dil ten içre ‘aşkla yanmakda biz pervâneyüz

‘Ârifâ zerrende şemsi gördün ise bak bize
Katremizden göresin biz bahr-i bî-pâyâneyüz

Mülk-i istiğnâdayız ‘ankâ sıfat açdık kanâd
Sûret-i fakr ile uçduk vahdete şâhâneyüz

Sıdkla bak zâhidâ sanma cüdâ yârdan bizi
Gülistân-ı lâ-mekânda yâr ile seyrâneyüz

‘Âlem-i esfelde süflîyüz bugün biz sûretâ
Ma’nîde kenz-i hafîden bî-behâ dürdâneyüz

Kâf-ı tende vahdete pervâz durur dil dem-be-dem
Tende dil ‘ankâ sıfatdır murg-ı ‘aşka lâneyüz

Seyr-i dîdâr itmek içün cân diler cânânı lîk
Zâhirâ biz cânız ammâ ma’nîde cânâneyüz

Lâ-mekândan bî-nişândan bir haber vir Sa’di’yâ
Külle yevmin şân dayız biz bî-nişânız yâ neyüz