Ben ol merd-i Hudâ’yem ki elim çekdim dükkânımdan
Metâ’-ı dünyâdan geçdim haber geldi mekânımdan

Geçüp sahrâ-yı heyhâtı irişdim mevc-i bahrine
Bezendi her sadef dürden kemâl-i mihrbânımdan

Perî-peyker güzellerden serâser zeyn olup ‘âlem
Göründü türlü elvânı zuhûr itdi zamânımdan

İçildi bâdeler yer yer çalındı bengü def neyler
Tutup mestâneler bezmi cihân doldu figânımdan

Yakup dil âteş-i ‘aşkı vücûdum mahv idüp âhir
Halâs oldu gönül cânâ benim bâr-ı girânımdan

Göründü bir ‘aceb yüzden ki gözler görmemiş anı
Giyindim hulle-i cennet alup şâh-ı cihânımdan

Serâpâ ‘ayn-ı zâtem ki hakîkat bunda ey Nakşî
Dü kevne dîdebân oldu benim ol müntehebânımdan