Seni senden ideriz şey’enlillah
Buyurdun “in te’uddû ni’metallah”

Gider benlik hicâbını aradan
Vücûdum zenbine estağfirullah

İki ‘âlem kuyûdundan kıl ıtlâk
Kıl esrârına vâkıf hâle âgâh

Tecellî-i cemâlin eyle in’âm
Mükerrer ola dâim gâh u bî-gâh

İrerse zerrece derdin bu câna
Dü ‘âlemde ana bes ‘izzet ü câh

Umar lutfunu her gümrâh ü ‘âsî
Didin “lâ taknetû min rahmetillah”

Fenâyî bendeni irgür merâma
Anı fazlınla eyle hâss-ı dergâh