Cûşa geldi bahr-ı zât izhâr itdi nice mevc
Geldiler bu ‘âlem-i nâsûte andan fevc fevc

Nice bin Mûsâ vü Firavn eyledi andan zuhûr
Giydi her biri libâsın kimi râst u kimi kec

Lîk cûşa geliserdir bir dahi o bahr-ı zât
Eyleyiser ‘âlem-i imkânı cümle herc u merc

Zerre denlü ‘ârife gelmez bu hâletden keder
İrmek istersen bu sırra varlığından durma geç

Katre-i nâçîze bahr-ı bî-kerân pinhân olur
‘Ârif isen bu mu’ammâyı Sezâyî sen de seç