Her kimin kim hâli vardır kıyli vü kâli nider
Çün kanâ’at tadın aldı sükker ü balı nider

Anların kim Hakk’a lâyık bî-riyâ ef’âli var
Ol sıfatlı kimseler ebhâs u akvâli nider

Her ki hablullahı tutdu lâ-cerem buldu necât
Ayruk ol kibri vü hırsı bendi ağlâlı nider

Sohbet-i hâss isteyen kor mahfilin ‘âmîlerin
Meclis-i merdân bulanlar cem’-i cühhâlı nider

Kankı kul kim pâdişâhın emrine oldu mutî’
Ol Çalab’ın tâ’atinden özge işgâli nider

Virmedi nakkâşı bulan nakş u renge cân u dil
Ak u kara gök ü saru kızıl u alı nider

Çün tecerrüd menziline ‘azm idüp girdi yola
Yükünü yiynildibilen kaydı hammâlı nider

Âyet ü ahbâr ününe her kim oldı müstemi’
Savt u nây u def ü çeng ü sâzı kavvâlı nider

Bâtınında kankı dervîşin ki ihlâs olmadı
Zâhirinde kuru zerk u hırka vü şâlı nider

‘Akl u cânı nefs ü tende cehd ile gâlib kılan
Pehlevân-ı ‘âlem oldur Rüstem-i Zâl’ı nider

Kamular dirlik dilerler ol ölümün arzûlar
Bâkî ‘ömr ister bu fânî mâhı vü sâlı nider

Kendüyi pervâne çün kim şem’a urdu yandı hoş
Dost ile vasl oldu ayruk perri vü bâli nider

Dostu soran dosta iren dostu gören ‘aşk eri
Kaşlar u gözler mi gözler zülfü vü hâli nider

Don u tay u hûy u hây u mansıba kılmaz nazar
Tâc u tahtı rûz u bahtı milki vü mâlı nider

Bu Kemâl Ümmî Çalap’dan ol ulular hâlini
Dâim ister ger bulursa gayrı ahvâli nider