Bak bu ‘acâib işlere kim bî-niyâz ider
Yaratdı külli şey ana zikr ü niyâz ider

Evvel sığınır ol Hakk’a yâd ider adını
Her türlü tâife her işe kim âğâz ider

Ol Hakîm’in ki işlenir uş dest-i kudreti
Bir gör bu türlü sun’u kim ol Kârısâz ider

Dilerse dünü gün dilese günü dün kılar
Dilerse yazı kış dilese kışı yaz ider

Bir vakt içinde ‘âlemi geh ıssı geh sovuk
Açık iken havâ bulut iken ayaz ider

Dilerse yoğu vâr dilese vârı yok kılar
Dilerse kazı bâz u dilese bâzı kaz ider

Mazlûmda sabr u âh kodu zâlimde zulmü câh
Kimin kimine serçe kimin güçlü bâz ider

Ol Şâh bu cümle kul kimi yoksul kimisi bay
Kimini Mahmûd idüp kimisin Ayâz ider

Bunda vü anda bir kulunu kıldı redd-i hôr
İki cihâna ol birini ser-firâz ider

Kimin sa’âdet ehli namâz ehli key sa’îd
Kimin şekâvet ehli şâkî bî-namâz ider

Bin benlik ile ol birini göğe ağdırır
Âhir bahâne ölmeğine bir üyez ider

Bir fâsıkın mecâzını ilter hakîkate
Bir zâhidin hakâyıkın âhir mecâz ider

Kimin yaratdı ‘âlim ü nâdân kılar kimin
Kimin bed-nefes kimisin hoş-âvâz ider

Ol bî-nişân cemâline ‘âşık olanların
Gözünü yaşlu derd ile benzin sâz ider

Kimini kıldı sağ u selâmetde şâdumân
Kimin hemîşe pür-gam u haste hılâz ider

Kimine mâl u mülk müyesser kılar tamâm
Kimin fakîr u bî-hüner ü bî-cihâz ider

Kime hazerde rûzi kılar Ka’be müzdini
Kimi seferde ‘azmini hacc u Hicâz ider

Kimi vatanda kaldı karâr itdi dâimî
Kimi revende ‘azm u Hıtâ vü Şirâz ider

Kimini cehl ü ‘âmm kılar ‘aşkı derdi yok
Kimini ehl-i ‘ârif ü hem ‘aşk-bâz ider

Ba’zı celâl-i hüzniyle âh ider müdâm
Ba’zı cemâl-i hüsniyle fahr u nâz ider

Cinn ü melek bû-Âdem ü hayvân her biri
Dillü dilince hâlini ol Hakk’a râz ider

İlhâm ol itdi hem bu Kemâl Ümmî gönlüne
Kim dile geldi ‘aşk ile her sözü sâz ider

Yâ Rab hatâlı kullara senden ‘atâ gelir
Fazlın şikeste-dilleri dâim nevâz ider

Ben kim olam ki kudretine ‘akl irişdirem
Eblehdir ol kimesne ki sözün dırâz ider

Yüz bin denizde katreni yüz bin lisân senin
Yüz bin yaşasa herbiri şerh itse az ider