Almak istersen eğer himmet-i ehlullahı
Bî-edeb olma gözet hürmet-i ehlullahı

Nâm-ı ‘âlîlerini yâd ile kıl istimdâd
Göresin tâ ki nedir kudret-i ehlullahı

Hâsıl itmek dileyen ‘ayn-ı yakîn kuhl eyler
Hâk-i pâk-i kadem-i ‘izzet-i ehlu’llahı

Saykal-ı nûr ile itmiş kalem-i sun’-ı ezel
Müncelî âyîne-i sîret-i ehlullahı

Ebedî hay olarak terk-i fenâ eylerler
Sanma herkes gibidir rihlet-i ehlullahı

İnerek cünd-i melâik mele-i a’lâdan
Devr ider subh u mesâ türbet-i ehlullahı

Resm-i âyînini seyr it felek-i devvârın
O da icrâ idiyor ‘âdet-i ehlullahı

Kâtib-i kilk-i kazâ yazdı hatâdan ‘ârî
Nüsha-ı zât-ı melek-tıynet-i ehlullahı

Mazhar-ı sırr-ı ‘ulûm-ı ezelî eyledi Hakk
Dil-i pâkîze-ter-i hazret-i ehlullahı

Kişi mümkin mi ola ‘ârif-i esrâr-ı ma’âd
Okumazdan nüsah-ı âyet-i ehlullahı

Kurb-ı Hakk’a varamaz dağdağa-ı kesretden
Bulmayan şâh-reh-i vahdet-i ehlullahı

Mey-i ‘aşkıyla meğer tâlib ola mest-i müdâm
Yoksa bilmez nicedir hâlet-i ehlullahı

İtmeyen zirve-i ‘aşk-ı hikem-i Hakk’a urûc
Ne bilir mertebe-i rıfat-ı ehlullahı

Hâkim-i mülk-i şuhûd olmayıcak bir dervîş
Giyemez tâc-ı ser-i devlet-i ehlullahı

Hân-ı elvân-ı hakîkatdan olur bî-behre
Bulmayan vâsıta-i ni’met-i ehlullahı

Anlamaz medrese-i kâfile rûşen ma’nâsın
Okusun tut kütüb-i hikmet-i ehlullahı

Mâsivâ câmelerinden soyunup ‘uryân ol
Giymek istersen eğer kisvet-i ehlullahı

Ger olursa sana iklîm-i velâyet mekşûf
O zamân gör şeref ü şevket-i ehlullahı

Zîver-i gûş-ı kabûl eylemeyen nâdâna
Açma bahs-i dürer-i sohbet-i ehlullahı

Ekserîsi görünür halka abâ-pûş olarak
Zâhirinde arama zînet-i ehlullahı

Hûr-ı cennetden ider kat’-ı nigâh-ı hâhiş
Görse zâhid harem-i vuslat-ı ehlullahı

Sanma muhtâc-ı tenâvül ola yâ vuslat-ı hûr
Böyle bilmek ne galat cennet-i ehlullahı

Kapusunda kul ider şâh-ı cihân-ârâyı
Virse bir ‘abdine Hakk rütbet-i ehlullahı

Zîr u bâlâyı ider emrine munkâd u mutî’
Dûş-ı ihlâsa alan râyet-i ehlullahı

‘Âdet-i Hakk’a muhâlif bir iş itmez yoksa
İtse seyr it o zamân kudret-i ehlullahı

Der-pey-i silsile-i dûzah olur her nefesin
Sedd idersen nefesi râhat-ı ehlullâhı

Sebeb-i devlet olur her dü-serâ ey Ârif
İltizâm eyle hemân hıdmet-i ehlullahı