Aşkı ser-gerdân u ‘âşık eyleyen dîdârına
Hüsnü de meftûn u hayrân eylemiş ruhsârına

Târ u mâr olmuş muhabbet zülfünün dil-bestesi
Vecd ü şevk üftâdedir bâb-ı şefâ’at-bârına

Lâ-yezâlî şâd-mânî câvidânî neş’eler
Câ-be-câ tefrîş idilmiş hâk-i ‘arş-âsârına

Hurde bir kandîldir Tûr-ı tecellî-i Kelîm
Dest-i hayret ber-dehân Mûsî-i cân envârına

Kubbe-i ‘ulyâsının maksûresi ‘arş-ı ‘azîm
Sidredir her gûşesi Cibrîl hizmetkârına

Ma’nî-i Kur’ân tecessüm eylemiş olmuş harem
Hazret-i Hakk’ın habîbi Ahmed-i Muhtâr’ına

Cân atup gelmiş cinândan bü’l-beşer bin şevk ile
Eylemiş evlâdını âmâde cân îsârına

Ben neler gördüm der-i feyzinde Remzî ‘akl-sûz
Sığmıyor kudsiyyeti şâ’irlerin eş’ârına