Aşkın tarabı gelse dile dinle o sâzı
Kim andan ider cümle felekler tek ü tâzı

Bir nağme ile ‘âlemi hep raksa getirmiş
Çün cân-ı cihân oldu anın perde-nüvâzı

Ger savt-ı cihân perdesi sırrın tanıdınsa
Bildin ki hakîkat neden ister bu mecâzı

Ma’lûmun olur kim ne için hâtır-ı Mahmûd
İsterdi şeb-i rûz ruh ü zülf-i Ayâz’ı

Muhtâc-ı niyâz-ı dil-i ‘uşşâk nedendir
Hüsn-i ruh-i cânân ki geçer cümleye nâzı

Her lahza nice renk ile çün zâhir olur ‘aşk
Dilberde ider nâzı o ‘âşıkda niyâzı

‘Aşkın yolu hoş yoldur o gâyet de yakındır
Hakkı bu rehi bul ko reh-i dûr u dırâzı