Aşksız ‘âlemde âdem olmanın imkânı yok
Derd devâdır ‘âşıka bî-derdlerin dermânı yok

‘Aşkdır her müşkilin miftâhı fethi fâtihi
‘Aşk ser-gerdânının bil müşkil ü âsânı yok

Zulmet-i ‘unsurda nûr-ı ‘aşkdan mahrûm olan
Ol bir insândır ki öyle vahşî bir hayvânı yok

Nâr-ı ‘unsûr nûr-ı ‘aşk ile olur gülzâr-ı tâmm
Server-i hûbân-ı ‘aşkın nûru var nîrânı yok

‘Aşk ile olmuş ‘ayân ser-çeşme-i âb-ı hayât
Bu hayât-ı câvidânın haddi yok pâyânı yok

‘Aşkdır hayvânı insân eyleyen insânı nûr
Bu rumûzâtın basîret ehline pinhânı yok

Sen seni bilmek dilersen ‘aşka terk et sen seni
Anda mahvol kim Kemâlî şân u âdı sânı yok