Bîzâr kalanından iden ol Hakk ile bâzâr
Bâ-zâr ola ol derd ile hîç olmaya bî-zâr

Yazar humârını içen ol tevbe şarâbın
Hüşyâr tutar pendi gönül levhine yazar

Dindârı fenâ içre tutan olmaya kin-dâr
Hem dâr-ı bekâda ol ola mü’min ü dindâr

Azar yolundan ne kadar zâhid olursa
Şol kim kıla bir haste şikeste-i dil-âzâr

Arar u bulur cidd ile her kim neyi ister
‘Âşık kişi ma’şûku yolunda kaçan arar

İnkârı ko elden ki müyesser ola her kâr
İkrâr ile gel hak sözü tut eyleme inkâr

Yol var u düriş mürşid ile menzile iriş
Ger varmaz isen saçını sakalını yol var

Düş var ayaġına elin öp mürşid-i şeyhin
Diler isen âsân ola sana kamu düşvâr

Ağyâr yüzü kara sana eylemeye kâr
Ger ola nigehdâr sana ol yüzü ağ yâr

Salar seni eğri yola reh-zen-i Şeytân
Doğru Hakk’a ilter uyanı seyyid-i sâlâr

Yalvar u dile âdem isen cennet ü dîzâr
Yoksa ite her kandayısa cîfe vü yal var

Al var nasîb ister isen o Hakk kapusundan
Ko halkı ki çoğunda delim fitne vü âl var

Eş’âr yolundan atını yar gerek ise
Var fakr ile fahr eyle çi ebyât u çi eş’âr

Dâ’ var u devâ yok sana mâlında sevincin
Tîmâr ola her derdine ger terk ola davar

Al dâr-ı bekâ ‘âkıl isen vir bu fenâyı
Gaddâr-durur çarh sakın kim seni aldar

Başları virürler yaş ile şem’ bigi çok
Bu şem’de her kim ki dil uzatmağa başlar

Dil dar olıcak saklayımaz sırrı kılur fâş
Gönül gen olıcak sığar anda ulu dildâr

Yakar o hezârân per-i pervâneyi derhâl
Kaçan ki çerâğın yakışur yanına yakar

Yarar bizi o nefs ü hevâ yâr katından
Kim hîç bir eyü dirliğimiz yok ana yarar

Uyar ey Kemâl Ümmî gönül gözünü bugün
Tâ göstere dîzârını yarın sana o yâr

Onar bizi doğru yola sen ey yüce Hâdî
Her kime ki sen on dir isen azmaz ol onar