Devr-i tevhîd içre dem ur nâleler kıl âh ile
Gir sarây-ı ‘aşka gel yâr olma her gümrâh ile
Şâhid-i ma’nâyı seyr eyle dil-i âgâh ile
Cân gözün eyle münevver nûr-ı zikrullah ile

Kaplayup jeng-i keder mir`ât-ı nûr-ı enverin
Cilveger her zerrede mahbûbu görmez gözlerin
Rû-be-rû görmeklik istersen cemâlin dilberin
Cân gözün eyle münevver nûr-ı zikrullah ile

Hakkıyâ sebel-i cehâlet perde çekmişdir dile
Var ulu’l-ebsârdan tıfl-ı dile himmet dile
Şâhid-i gaybı şuhûd it dîde-i tevhîd ile
Cân gözün eyle münevver nûr-ı zikrullah ile