Yâ şefî’ hâzır olsun himmetin
Çün niyâz-menddir kapunda ümmetin
Dilleri şâdân buyursun tal’atin
Çün niyâz-menddir kapunda ümmetin

Ümmet olduk sen gibi peygambere
Kıl şefâ’at biz gibi ‘isyân-gere
Etme muhtâc ümmetin diğerlere
Çün niyâz-menddir kapunda ümmetin

Mah-cemâlinle müşerref olsak âh
‘Afv olup sâyende her cürm ü günâh
Ümmete lutf eyle ey ihsân-penâh
Çün niyâz-menddir kapunda ümmetin

‘Ayn-ı rahmetdir zuhûrun ‘âleme
Bâ’is oldun çün vücûd-ı âdeme
Rûşenâ gelse ‘aceb mi dîdeme
Çün niyâz-menddir kapunda ümmetin

Sen efendim dest-gîrimsin benim
Bâd-ı lutfunla açılsın gülşenim
Fevzî-veş âzâd ola cân ü tenim
Çün niyâz-menddir kapunda ümmetin