Çünkü Hakk evvelliğin bildin ayân
Dinle imdi kılayım sun’un beyân

Hakk teâlâ ne yaratdı evvelâ
Cümle mahlûkdan kim ol evvel ola

Hem sebeb olmuş ola bu varlıga
Aşk ile dinleyeni Hakk yarlıga

Mustafâ rûhunu evvel kıldı vâr
Sevdi anı ol Kerîm ü Girdigâr

Nice bin yıl terbiyet kıldı ana
Anla işbu sözleri batgıl tana

Mustafâ’yı kendüye kıldı habîb
Cümle derdlere hem ol oldu tabîb

Her ne türlü kim seâdet var durur
Yahşî hûy u görklü âdet var durur

Hak ana verdi mükemmel eyledi
Yaradılmışdan müfaddal eyledi

Cümle lutfu Hakk ana kıldı nasîb
Anın için kıldı kendüye karîb

Andan oldu her nihân u âşikâr
Arşda ferşde yerde gökde ne ki vâr

Ger Muhammed olmaya idi ayân
Olmayısardı zemîn ü âsumân

Ger Muhammed olmasa idi ey yâr
Olmaz idi ay u gün leyl ü nehâr

Ger Muhammed gelmeyeydi âleme
Tâc-i izzet ermez idi Âdem’e

Ger Muhammed gelmese sen şunu bil
Ne kulak işidüben söylerdi dil

Ger Muhammed’den şefâat olmasa
Deng-i küfrün zulmetini kim basa

Ol Muhammed’den açıldı dînimiz
İslâm içre dîn ile îmânımız

Hem vesîle olduğu’çün ol Resûl
Âdem’in Hakk tevbesin kıldı kabûl

Nûh anın’çün garkdan buldu necât
Dahî doğmadan göründü mu’cizât

Ölmeyüp Îsâ göğe bulduğu yol
Ümmetinden olmak için idi ol

Hem dahî Mûsâ elindeki asâ
Oldu anın hürmetine ejdehâ

Ceddi olduğu’çün anın ol Halîl
Nârı cennet kıldı ana ol Celîl

Cümle anın dostluğuna adına
Bunca izzet oldu ol ecdâdına

Çok temennî kıldılar Hakk’dan bular
Kim Muhammed ümmetinden olalar

Tâ buların arta izz ü hürmeti
Dahî yeğrek ola Hakk’a kurbeti

Haşre dek ger denilirse bu kelâm
Nice haşr ola bu olmaya tamam

Ger dilersiz bulasız oddan necât
Aşk ile derd ile eydün es-salât