Hakk ‘âşıkı olanların
Dâim işi tevhîd olur
Terk-i sivâ kılanların
Dâim işi tevhîd olur

İtmez ma’âş içün keder
Halkdan kaçup Hakk’a gider
Durmaz lisânı zikr ider
Dâim işi tevhîd olur

Mevlâ’sına eyler firâr
Zikrin ider leyl ü nehâr
Bu kârı idüp ihtiyâr
Dâim işi tevhîd olur

Cismi olur insân ile
Kalbi olur Yezdân ile
Gâh gizli gâh ihvân ile
Dâim işi tevhîd olur

‘Aşkı ider rûha gıdâ
Zikri ider kalbe cilâ
Tevhîdde buluban safâ
Dâim işi tevhîd olur

Fakr ile ider iftihâr
‘Aşk oduna dâim yanar
Bilmez nedir nâmûs u ‘âr
Dâim işi tevhîd olur

Vahşî olup ‘uzlet ider
Halkdan hemîn nefret ider
Mevlâ ile sohbet ider
Dâim işi tevhîd olur

Kuddûsî’nin pendi sana
Zikr-i Hudâ’dır dâimâ
‘Âşıkların subh u mesâ
Dâim işi tevhîd olur