Dünyâya emr-i Hakk-ile geldim
Anı tesbîh ü tehlîle geldim
****
Ma’rifet içün halkı yaratdı
Ben de ‘irfânı tahsîle geldim
****
Çün buyurdı ben gizlü kenz idim
Bende ol remzi te’vîle geldim
****
Aslım benim bir katre su idi
Bu şekle gör ne hâl ile geldim
****
Aluban lezzet babam vikâ’dan
Cümle a’zâsından bile geldim
****
Bilden kopıban rıfk-ile akub
Turmayub ol dem ihlîle geldim
****
Ana rahmine akub ihlîlden
Hami ü sakîle tahmîle geldim
****
Pes iki nutfe karışub sonra
Bir kıt’a lahme tebdîle geldim
****
Olıcak dört ay bak sun’-ı Hakka
Şekl-i inşânı temsîle geldim
****
Tokuz ay durub ana rahminde
Dünyâya cism ü cân-ıla geldim
****
Şekl ü sûret hîç yok idi evvel
Şimdi bu gökçek şekl-ile geldim
****
Tıfl-idim dilim söylemez idi
Büyüyüb sonra hoş dile geldim
****
İrdim bülûga ‘ışk beni tutdı
Râh-ı merdâna ‘ışk-ıla geldim
****
Gün-be-gün artdı derd-i ‘ışk dilde
‘Ar u nâmûsı ta’tîle geldim
****
Yalınız sanman siz beni zîrâ
‘Işk-ıla Hakkı ben bile geldim
****
Gerçi bir tamla su idim ammâ
‘Işk-ıla akub ben sîle geldim
****
Karışub sîle çağlayub coşdum
Bahri özleyüben Nîle geldim
****
Cümle halk Hakka ta’zîm iderler
Ben de ta’zîm ü tebcîle geldim
****
‘Uşşâkı gördüm dosta giderler
Olmağa yoldaş ol cîle geldim
****
Gelmişem andan giderim ana
Ana rücû’ u tebdîle geldim
****
‘Ârif-i Hakkım ben tâ ezelden
Varlığ u birliğin bilegeldim
****
Dilimde zikri kalbimde fikri
Özimi ana tavsîle geldim
****
Bed huylarımı ‘ışk himmetiyle
Hulk-ı hamîde tahvîle geldim
****
Gerçi taksîrim kullukda çokdur
Pes i’tizân tatvîle geldim,
****
Zühdün safâsm bulmadım hergiz
‘Işkı kamuya tafsîle geldim
****
Dir ki Kuddûsî rütbemi bunda
‘Avn-i Bâr ile tekmile geldim

Ahmed Kuddusi