Ey bu mahlûkâtı kün emriyle var iden Hudâ
Cümlesi kulluk iderler her zemân dâ’im sana
****
Nutfe-i murdâr idim virdin bana bu hey’eti
‘Işk u cezbe ma’rifet hem eyledin ihsân bana
****
Olmışam ‘âşık sabî iken sana ez-cân u dil
Geçdi ‘ömrüm zikrin ile gice gündüz dâ’imâ
****
Şimdi oldum haste koca seksân ikidür yaşım
Dil ile hem kalb ile zikr eylerem subh u mesâ
****
Sana ma’lûm tâkatim yok cismim ile kulluğa
‘Aciz ü bî-çâre bende olmışam ‘afv it şehâ
****
Pes bu nazmı eyledim tahrîr firâşda güc ile
İsterem bu hâl-i za’fımda hemîn sana likâ
****
Rûz u şeb eyler bu Kuddûsî du’â ağlayuben
Hem ider senden Gafûrâ mağfiret rahmet recâ

Ahmed Kuddusi