Ey gönül ağyârı terk it yârı gör
Çeşm-i cânın bir nefes uyarıgör

Güldür maksûd olan hârı bırak
Her varakda lafz-ı ma’nidârı gör

Şol sadefde dürr-i meknûnu gözet
Gevher içün semt-i kâna varıgör

Sohbet-i sultânı gözler kul olan
Dârı ko dâr içre şol deyyârı gör

Yârı görmek olmaz ise âşikâr
Bâri anı remz iden âsârı gör

Bâb-ı Hakk’da feth olınca müşkilin
Hakkıyâ Hakk’a yürü yalvarıgör