Ey gönül ol hancer-i müjgâna eylersin heves
Kasd-i can ettin bekâ-yi ömrden peyvendi kes
Çekme gurbet azmine ey sâr-ban mahmil sakın
Kim bu yolda bîm-i gurbettendir efgân-i ceres
Hâl-i zârımdan seni feryâdım âgâh eyledi
Şükrü li’llâh oldu feryâdım bana feryâd-res
Birbirine sancılıp her yan tenimde okların
Murg-i ruhum kaydına olmuş müretteb bir kafes
Ta’ne-i ehl-i melâmetten ne noksan âşıka
Berk-i lâmi def’in eyler mi hücûm-i hâr ü has
Sûz-i aşkın tende nâ-geh bulmasın noksan deyu
Can çıkınca isterim çıkmaya tenden bir nefes
Ey Fuzûlî ben kana’at mülkünün sultanıyım
Saltanat esbâbı eğnimde pelâs-i fakr beş

Fuzuli