Ey kerem kânı ey ganî sultân
Umarız senden kullara ihsân
Fazlına had yok lutfuna pâyân
Umarız senden kullara ihsân

Bendenin gerçi cürmü artukdur
Likîn sen şâhın rahmeti çokdur
‘Âsîler içün kapun açıkdur
Umarız senden kullara ihsân

Lutfun olmazsa bu günehkâre
Yüzü mü vardır sana yalvara
Fazlın ile kıl derdime çâre
Umarız senden kullara ihsân

Ol gedâlar kim kapuna geldi
Zârîler kılup sâilin oldu
Sana yalvarmak devletin buldu
Umarız senden kullara ihsân

Nûrî miskînin ‘aşkına düşdü
Zümre-i ehl-i derde konuşdu
Nâr-ı şevkinle nice yıl pişdi
Umarız senden kullara ihsân