Ey kerem-şânım Kerîm’in bahr-i eltâfındasın
Misli yok hût-i mu’azzam hubb-i deryâsındasın

Kendi nûrun kabz idüp Hallâk-ı ‘âlemden ezel
Ol Habîb’im yâ Muhammed emr-i vâlâsındasın

Kubbe-i kudret kuralı neyyir-i a’zam seni
Gösterüpdür enbiyâya tâk-ı mihrâbındasın

Yed-i kudretle virüp fermân-ı muhtâriyyetin
Muktedâ-yı enbiyâsın Leyl-i Esrâ’sındasın

Şâh-ı evreng-i şefâ’at matla’ı mihr-i hüdâ
Hurşîd-i rûz-i kıyâmet taht-ı livâsındasın

“Kâbe kavseyni ev ednâ” bezm-i vuslat mahremi
Vâkıf-ı sırr-ı “mâ evhâ” kurb-i Mevlâ’sındasın

Hâzin-i kenz-i füyûzatsın Muhammed Lutfî’ye
Bir nazar kıl ki Kerîm’in ‘ind-i ma’nâsındasın