Gel gör ahi dost bâğının handânıyam handânıyam
Gitmek dilersen ol ilin burhânıyam burhânıyam

Dilimdedir zikr ü adı kalbimdedir fikr ü dâdı
Varlığım ol mahv eyledi ‘ummânıyam ‘ummânıyam

Sâim kâim ne maksûdum ay gün değildir ma’bûdum
Ne şemsîyem ne kamerî Sübhânîyem Sübhânîyem

‘Aşkına bağlıdır başım ‘aşkdır dâimâ yoldaşım
‘Aşk ile ben dü cihânın sultânıyam sultânıyam

Er yüzünden erdim ana pîr yüzünden gördüm anı
Dâim şükür ben ol dôstun mihmânıyam mihmânıyam

Ben erişince ol hâna külli varım oldu fenâ
İsmâîlem kıydım câna kurbânıyam kurbânıyam

Nûr-ı muhabbetden ezel sundu bize ol lâ-yezâl
Gelsin bugün derdlilerin dermânıyam dermânıyam

“Lâ” diyenler güftârıma ermez benim esrârıma
Ol Vâhid ü Ferd ü Ehad Rahmânîyem Rahmânîyem

Ümmî Sinân eydür inan gel sözüme tutma gümân
Şimdi zamân içinde ben devrânîyem devrânîyem

Ümmi Sinan