Katraya kılmam nazar ‘ummânı gözler gözlerim
Zerreyi nidem meh-i tâbânı gözler gözlerim

Dürr-i ‘irfân tâlibiyem bahr-ı ‘ilm içre bugün
Himmetim bir gevherdir anı gözler gözlerim

Bakmazam kasr-ı cihân-ı pâdişâhâna bugün
Ben harâbât ehliyem vîrânı gözler gözlerim

Eyleme kühl-i Sıfahan’ı bana arz ey kişi
Hâkipây-i âdem-i ‘irfânı gözler gözlerim

Hakkıyâ dünyâ vü ‘ukbâyı nider ‘âşık olan
Anın içün dâimâ Rahmân’ı gözler gözlerim