Heyûlân nûr-i Hudâ şems-i seâdet ebedî
Ey hidâyet güneşi nâşir-i feyz-i Samedî
Yevm-i mahşerde olan enbiyânın müstenedi
Ehl-i tevhîd olanın rûz-i cezâ mûtemedi
Sendedir ümmet-i merhûmenin afvi senedi
Meded ey kāfile-sâlâr-ı rusül huz bi-yedî
****
Dür-i deryâ-yı seâdet sana kıymet mi yeter
Mihr-i vâlâ-yı hidâyet sana himmet mi yeter
Kerem-i Zât-ı Kerîm devlete devlet mi yeter
“Rahmeten li’l-âlemîn” Ahmed’e hurmet mi yeter
Memdûh-i Hazret-i Hak sana muhabbet mi yeter
Meded ey kāfile-sâlâr-ı rusül huz bi-yedî
****
Kütüb-i münzelesinde seni medh etdi Hudâ
Kendi nûrun kabz edüp Habîb’im ol dedi Hudâ
Habîb-i Kibriyâ’sın âleme doldu bu nidâ
Server-i enbiyâ ser-defter-i dîvân-ı hüdâ
Neyyir-i a‘zam-ı eflâk-i şefâ‘at mededâ
Meded ey kāfile-sâlâr-ı rusül huz bi-yedî
****
Muktedâ eyledi Hak Mescid-i Aksâ’da seni
Enbiyâ zümresine Leyle-i Esrâ’da seni
Zikr edüp Hazret-i Hak mele-i a‘lâda seni
Mihmân eyledi Hudâ sadr-ı “ev ednâ”da seni
Gösterüp melekûte rutbe-i ulyâda seni
Meded ey kāfile-sâlâr-ı rusül huz bi-yedî
****
Ey kerem-şân keremin bahrine kenâr mı olur
Keremin sahrâsı âlemde nihâyet mi bulur
Sarf olsa bahr-i kerem katresi noksân mı olur
Şevket-i şefâ‘atin mecma-‘i mahşeri alur
Enbiyâ ümem ile hep Livâ-i hamd’e gelür
Meded ey kāfile-sâlâr-ı rusül huz bi-yedî
****
Senden istirhâm eder bây u gedâ her dü-serâ
Keremin mâden-i dergâh-ı kadîm-i fukarâ
Dâim istimdâd eder cân ile senden küberâ
Vücûdun mevcûduna oldu bu cerâ mâ-cerâ
Sebeb-i hilkat-i mahlûk-ı Hudâ nûr-i verâ
Meded ey kāfile-sâlâr-ı rusül huz bi-yedî
****
“Kābe kav sey ni ev ednâ”da o dem Zât-ı Celîl
“Üdnü minî” tâcını verdi sana nûr-i Cemîl
O tâc oldu hidâyet zümresine şem-‘i sebîl
Denilir mi sana ümmet olana zâd-ı kalîl
Keremin gözlemede Lutfi kulun abd-i alîl
Meded ey kāfile-sâlâr-ı rusül huz bi-yedî

Alvarlı Efe Muhammed Lütfi Hazretleri