Ey gönül ‘izzetle zillet ikisi birdir bana
Ya köle ya tâc-ı devlet ikisi birdir bana

Ya gül ü ya hâr ola ya yâr u ya ağyâr ola
Ya mahabbet ya ‘adâvet ikisi birdir bana

Olmadı halkın dilinden çünki bir kimse halâs
Ya selâmet ya melâmet ikisi birdir bana

Çekmedi ben çekdiğim mihnetleri híç bir ehad
Şimdi ya mihnet ya râhat ikisi birdir bana

Kangı gün akşama irmez ‘âlem-i dünyâda bak
Ya ziyâ ola ya zulmet ikisi birdir bana

Göz göre mir’ât-ı ‘âlemde çü yok rûy-i safâ
Ya safâ vü ya küdûret ikisi birdir bana

Alışır terkíb-i zehr-i mâr ile tiryâklar
Ya elemdir ya ki lezzet ikisi birdir bana

Nakd-i ‘ömrü virmeden gayrı nedir ‘âlemde sûd
Ya hasâret ya ticâret ikisi birdir bana

Bu kemâl ile çü noksânım arar halk-ı cihân
Ya fazîlet ya cehâlet ikisi birdir bana

Ya Dımaşku’ş-Şâm ya Burusa Hakkıyâ
Ya kıyâmet ya ki hicret ikisi birdir bana