Bizi varlık hicâbından halâs it
Meded ey pâdişâhlar pâdişâhı
Kerem kıl bâde-nûş-i bezm-i hâss it
Meded ey pâdişâhlar pâdişâhı

Münevver eyleyüp nûr-ı şerî’at
Sırât-ı müstakîm olsun tarîkat
İhâta eylesin bahr-ı hakîkat
Meded ey pâdişâhlar pâdişâhı

Tarîkat potasında nefsi kâl it
Bu kâl içinde koma ehl-i hâl it
Esirge lâyık-ı bezm-i visâl it
Meded ey pâdişâhlar pâdişâhı

Geçir ‘âşıkların savt u sadâdan
Güzer kılsın cemî’-i mâsivâdan
Hayât irsin ana bûy-i bekâdan
Meded ey pâdişâhlar pâdişâhı

Esirge bu Hüdâyî derdmendi
Ki zîrâ mahz-ı fazlına dayandı
Sarây-ı vahdete irgür Efendi
Meded ey pâdişâhlar pâdişâhı