Abdullah Tamamlar-Olmuşam Aşık Bugün Ben

Olmışam ‘âşık bugün ben çün şeh-i hûbânıma
İstemem ağyarını hîç gelmesünler yanıma
****
Mest ü bî-hûş eyledi şevki beni oldum delü ‘
Arz-ı hâl sunmağa geldim ol ganî sultânıma
****
Bir elimde ‘arz-ı hâlim bir elimde dest-mâl
Silerem göz yaşını yalvaruban cananıma
****
Beklerem kapusını boynum eğüb giryân ü zâr
Umaram ki rahm ide bu âhıma efgânıma
****
Cürm ü ‘isyan bî-nihâyet eylesem de dâ’imâ
Bakmaz ol asla benim hîç cürmime ‘isyanıma
****
Setr ider hem ‘aybımı halk içre rüsvâ eylemez
Dir hemîn ‘afv eylerem ben kaçma gel dîvânıma
****
Dürlü ni’metler virir lâyık değil isem de ben
Gönderir mi’mârı tîz tîz bu dil-i vîrânıma
****
Böyle behcet böyle ahlâk bu güzellik kimde var
İsmini yâd eylemek virir safâlar canıma
****
Nice ‘âşık olmasun bî-çâre Kuddûsî aña
Ki dimiş ol ‘âşıkam ben ‘âşık-ı nâlânıma

Ahmed Kuddusi