Sabah-ı haşra değin yatma gaflet ile uyan
Yatar mı pister-i râhatda sırr-ı sûru duyan

Ne denli berk urursan binâ-yı a’mâli
Hemîşe sen yine dîvâr-ı lutf-ı Hakk’a dayan

Dirîğ ki bir nefes ‘ömrün hisâbını itmez
‘Abes yere gece gündüz bu denli mâl sayan

Hevâ-yı serd ile kalma mîzâcın it tashîh
Tennûr-ı ‘aşka düşüp kal ölünce var sen yan

Dime besdir bana bu denli ma’rifet ey dil
Ki hayli dûr-durur menziline şehr-i ‘ıyân

Sakın ey Hakkı sakın gümrahâne yol sorma
İderse mürşid ider sırr-ı ‘aşkı sana beyân