Sakla gönlün derdini sen söyleme hîç derdsize
Derdi kazan sa’y idegör kat giceyi gündize
****
Derdi olmayan behâ’ imdendir ol insân değil
Varmayalım yanına biz gelmesün yanımıza
****
Derd-i ‘ışkdur pes murâdım zikr ile kalbe tolar
Ol kadar zikr eyle kim ‘ışk tola deryâ-veş öze
****
Cümle zikrin efdali tevhîd buyurmışdur Resûl
Ol kadar çalış ana kim kalbinin bendin çöze
****
Zikr ile toğar gönülde şems ü ‘irfan nûr-ı zât
Mâsivâ görünmez olur zerre mikdârı göze
****
Umma düşmândan vefâ nâdâna sır keşf eyleme
Sanma sâdık her sana dostum deyü gülen yüze
****
Hem sadîkından hazer eyle emîn olma ki ol
‘Aybını düşmândan artuk bilüben katar söze
****
Varma nâmerd kapusına bitmez işin hem sana
Göricek hışm-ıla bakar yüzine eyler meze
****
Şerre bin altun virir hayra viremez birini
İstesen bir nesne andan pes kıyamaz bir koza
****
Mâlını itlâf ider Mevlâ kalur müflis melûl
Gider elden cümle varı kıyamaz iken aza
****
Ağniyânın meyli şimdi fâsık u bî-dînlere
Ehi-i Hak açlıkdan ölse dir ana gelme bize
****
İsteme hîç kimseden rızkı virir Rezzâk-ı halk
Her ne istersen dimez yok tâ ki varınca tuza
****
Di ne lâzım ise yâ Rab vir bana şu nesneyi
Sensin ancak rızkı viren çün bizim cümlemize
****
Ol Semî’dür hem Mücîbdür hem Ganîdür hem Cevâd
Viriser matlûbını atmaz seni yaza güze
****
Gice iste gündüz iste kapusı dâ’im açık
İder ihsân cümle ins ü vahş u baykuş u kaza
****
Çün virir dostlarına düşmânlarına ni’meti
Gussalanma rızk içün Hâlik virir bize size
****
Zahiri ta’mîre meşgûl olmagıl zâhidleyin
İtme tezyîn kalıbı var kalbi ‘ışk-ıla beze
****
İt tesebbüb yâ tevekkül besleyen Perverdigâr
Ko riyâyı kıl gönül kapusına ‘ışkı reze
****
Ergen isen itme rağbet şu zemân hatunına
Hak didi ezvâca fitne dahi oğlana kıza
****
Dinle Kuddûsî kelâmın tut bulam dirsen felâh
Münkirin sağır kulağı kalbi hem benzer buza

Ahmed Kuddusi