Yâ Resûlallah ‘ubeyd-i âsitânındır şüyûh
Hizmetinde cân-fedâ-yı âsitânındır şüyûh

Şehriyâr-ı dü-serâsın feyz-bahş-ı enbiyâ
Pâdişahlar çâkerindir bendegânındır şüyûh

Ol vecihden pâdişahlar ravzanın ferrâşıdır
Hazretinde bî-mecâl u nâ-tüvânındır şüyûh

Meşhedinde ‘âciz ü kemter olur elbet velî
Nazra-i pür-tâb ile sâhib-kırânındır şüyûh

Râh-ı fakr u zillet içre gerçi mahzûndur dili
Nîm-nigâh-ı lutfun ile şâd-mânındır şüyûh

İltifâtın bî-nevâya devlet-i her dü serâ
İftikâr ile gürûh-ı hâdimânındır şüyûh

Bu Salâhî bendeni lutf eyle âzâd eyleme
Dergehinde bende-i âzâdegânındır şüyûh