Bahâr oldu yine açıldı güller
Murâda bülbül erdiği zamândır
Safâ buldu ferahnâk oldu diller
Sanasın dağlar u bâğlar cinândır
Rahim Allah Kerim Allah La İlahe İllallah
Aziz Allah Habib Allah Muhammed Rasulallah

Saçıldı âb-ı rahmet kâinâta
Hayât erişdi eşcâr ü nebâta
Yetişdi her biri tâze hayâta
Basîret ehline günden ‘ayândır
Rahim Allah Kerim Allah La İlahe İllallah
Aziz Allah Habib Allah Muhammed Rasulallah

Ademden geldi her biri vücûda
Müsebbih hem kıyâm eyler sücûda
Nihâyet yok ‘atâ vü fazl-ı cûda
Hudâ’nın zât-ı pâkinden nişândır
Rahim Allah Kerim Allah La İlahe İllallah
Aziz Allah Habib Allah Muhammed Rasulallah

Hüdâyî lutf-ı Hakk’ı fikr edegör
Kemâl-i fazlına hem şükr edegör
Hudâ’yı cân ü dilden zikr edegör
Ki zikr-i Hakk hayât-ı câvidândır
Rahim Allah Kerim Allah La İlahe İllallah
Aziz Allah Habib Allah Muhammed Rasulallah