Sâkiyâ sun bâde-i aşkından uşşâka şarâb
Hasret-i la‘lin ile bağrım yeter etdin kebâb

Gör bahâristânda eşcâr u nebâtın neş’esin
Devreder bâd-ı sâbâ câm doldurur her dem sehâb

Nev-arûs-i âlemin meşşâtasın görsen eğer
Her çiçek Cibrîl olup senden sana eyler hitâb

Ey çemenzâra giren gâfil temâşâ kılma kim
Hüsnü çıkmış temâşâya şecer ü nehr ü hübâb

Cîfedir dünyâ ana baksan eğer hayvân gibi
Çeşm-i âdemle bakarsan bu durur hüsn-i meâb

Zâde-i tab-ı meni görme mübârek cismini
Sen seni bilsen eğer şânındandır yüz dört kitâb

Her nefes ihyâ imâta eyleyen kimdir seni
Kayd-ı unsurdur cehennem ger havâ vü ger türâb

Devlet-i dîdâr-ı yâri bulmak istersen eğer
Seyr kıl mirsâd-ı dilden sen sana olma hicâb

“Kenz-i lâ yefnâ-yı fakr”ın mahzeni gönlündedir
Gitme sevdâ-yı beyâbâna düşüp çekme azâb

Cümle eşyâda sıfâtullâhı gör olmuş ayân
Gerçi kesretde zuhûru bâtına çekmiş nikâb

Ârif ol kim her eser etmiş müessirden zuhûr
Nûr neşretmez kamer ger olmasaydı âfitâb

Nisbetindir nûru nâr eden nigâristânı hâr
Zıll-ı zâildir vücûdun gördüğün her su serâb

Çeşme-i âb-ı hayâtın menba‘ı sende nihân
Bulmak istersen Kemâlî aşka eyle intisâb