Gözlerini n’oldu bî-dâr eyledin
Âh u efgânı sana yâr eyledin
‘Aşk oduyla içini nâr eyledin
N’oldu bülbül işini zâr eyledin
Ne sebebden ‘azm-i gülzâr eyledin

N’oldu ağlarsın ne eylersin taleb
Bu tükenmez derdine n’oldu sebeb
Güldeki dîdârı mı gördün ‘aceb
N’oldu bülbül işini zâr eyledin
Ne sebebden ‘azm-i gülzâr eyledin

Bu fenâ gülzâre tâlibsen eğer
Hîç bekâsı yokdur anın tez geçer
Bu fenâ içre bekâ duydun meğer
N’oldu bülbül işini zâr eyledin
Ne sebebden ‘azm-i gülzâr eyledin

Ber-karâr olup biraz eğlenmedin
Dâim ağlarsın durup dinlenmedin
Kimse bilmez hâlini anlanmadın
N’oldu bülbül işini zâr eyledin
Ne sebebden ‘azm-i gülzâr eyledin

Bunca hasretden de cânın ne sezer
Firkatin günden güne artıp gider
Lutf edip ver gel Niyâzî’ye haber
N’oldu bülbül işini zâr eyledin
Ne sebebden azm-i gülzâr eyledin