Yine firkât nârına yandı cihân
Hasretâ gitdi mübârek Ramazân
Nûr ile bulmuşdu ‘âlem yeni cân
Firkâtâ gitdi mübârek Ramazân

İndi Kur`ân ey nûru güzel
Leyle‐i Kadr’inde ey kadri güzel
Gitdi ey tehlîl ü tekbîri güzel
Elvedâ gitdi mübârek Ramazân

Gâhi tesbîh ü senâ vü zikr ile
Gâhi tahmîd ü du’â vü şükr ile
Cân bulurdu mürde diller nûr ile
Hasretâ gitdi mübarek Ramazân

Bu ay içre bağlanır dedi Resûl
Cinn ü şeytân etmeye aslâ füzûl
Hep du’âlar bunda olurdu kabûl
Firkâtâ gitdi mübârek Ramazân

Cem’ olup Hakk’a münâcât edelim
Nûr‐i Kur`ân ile doğru gidelim
Bilmedik kadrin Niyâzî n’idelim
Ey dirîgâ gitdi şehr‐i Ramazân