Sen usandırma eli el de usandırmaz seni
Hîlekârlık eyleme kimse dolandırmaz seni
Dest-i a’dâdan soğuk su içme kandırmaz seni
Korkma düşmenden ki âteş olsa yandırmaz seni
Müstakîm ol Hazret-i Allah utandırmaz seni
****
Hep geçer ‘âlemde hiç bir hâlete yokdur sükûn
Zevke bak değmez teessüf etmeğe dünyâ-yı dûn
İstikâmet şerr-i a’dâdan seni eyler masûn
Hakk eder ashâb-ı sıdkın hasmını elbet zebûn
Müstakîm ol Hazret-i Allah utandırmaz seni
****
İster isen hıfz ede ‘ırzın Hudâ-yı lem-yezel
‘Irzına a’dâ-yı bed-hâhın bile verme halel
Tâ ezelden söylenir halkın dilinde bu mesel
Celb eder elbetde insâna mükâfâtı ‘amel
Müstakîm ol Hazret-i Allah utandırmaz seni
****
Garrelenmez rûz-i ikbâlin görüp ehl-i hıred
Her günü bir gad eder ta’kîb her sebti ehad
Seyl-i mevt ettikde berbad ömrü baht etmez meded
Böyle âteş-meşreb olma hâk olur birgün cesed
Müstakîm ol Hazret-i Allah utandırmaz seni
****
Halkı tahrîb eyleyip de kendin âbâd eyleme
Bu cihânda ev yapıp ‘ukbânı berbâd eyleme
Nef’in içün zâlim-i bî-rahme imdâd eyleme
‘Âlemi tenfîr eden hâlâtı mu’tâd eyleme
Müstakîm ol Hazret-i Allah utandırmaz seni
****
Seyyiât insâna nefs-i kemterîninden gelir
Her hacâlet Âdem’e sû-i karîninden gelir
‘İzzet ü zillet mekâna hep mekîninden gelir
İstikâmet müstakîmü’l-hâle dîninden gelir
Müstakîm ol Hazret-i Allah utandırmaz seni
****
Düşmeni tezlîl için hîle ile etme iştigâl
Hüsn-i efkâra olur hâil cihânda sû-i hâl
Yüzsuyu dökme teessüf çekme etme kıyl ü kâl
Sen sakîm olma verir maksûdun elbet Zü’l-Celâl
Müstakîm ol Hazret-i Allah utandırmaz seni
****
At riyâyı elden ıslâha çalış ef’âlini
Boşboğazlık etme ta’dîl eyle kıyl ü kâlini
Sen ne türlü saklayım dersen de sû-i hâlini
Hakk Te’âlâ senden a’lemdir senin hâlini
Müstakîm ol Hazret-i Allah utandırmaz seni
****
Hâline şeytân güler gördükde sende gafleti
Üstüne güldürme öyle düşmen-i bed-sîreti
Hâin olma ver emânetle cihâna şöhreti
Herkesin destindedir ‘âlemde zill ü rıf’ati
Müstakîm ol Hazret-i Allah utandırmaz seni
****
Zâmin ü kâfil olan erzâka Hâlık’dır sana
Mâsivâya ser-fürû’ etmek ne lâyıkdır sana
Izdırâbı celbeden meyl-i alâyıkdır sana
Gayr içün düşme lisân-ı nâsa yazıkdır sana
Müstakîm ol Hazret-i Allah utandırmaz seni