Ben sevdiğim nigârı nidem ol benden fârig
Ne verip hoş görünem iki cihândan fârig

Kimden kime varayım ahvâlim söylemeğe
Sözüm kime diyeyim sözden lisândan fârig

Cihânda kim giriser bu işin arasına
Ya kim hükm edebile sultân u handan fârig

Gerek müsülmân olam bin yıl ibâdet kılam
Gerekse kâfir olam küfr ü imândan fârig

Gerekse ehl-i millet farizasın bekleyem
Gerekse şöhret kovam şöhret ü dinden farig

Gerekse ilm-i dinde yüz bin kez minber depem
Gerekse şirk besleyem şirk ü gümândan fârig

Nice ticaret ile mekseb gösterem ana
Şöyle tüvangerdir ol assı-ziyândan fârig

Nicesi kulluk ile sevebilem ben ana
Hâs u âm anı sever cümle sevenden fârig

Onun gibi maşûka kim gönül verdi ise
Bî-aded tertip gerek ol ondan bundan fârig

Yunus sen sever isen hakîkat maşûkayı
Dervişlik ile kül ol kevn ü mekândan fârig