Kesâfet perdesin kaldır gözünden seyr et eşyayı
Kemâlât ehline peyrev olan anlar bu ma’nâyı

Bak ilhâm-ı İlâhî’den dolan dil kenz-i hikmetdir
Anı bul halleder ilm-i ledünle her mu’ammâyı

Gehî eş’âr ile şerh-i beyân eyler şühûdâtı
Gehî sohbet ile açar o mihr-i âlem-ârâyı

Kelâm-ı evliyâya taʻzîm etmek vâcib olmuşdur
Kütübhâne-i arefde teharrî et bu fetvâyı

Şiirde nâsır-ı Hassân olandır hazret-i Cibrîl
Bedir’de vasf ederdi nazm ile kadr-i muallâyı

Şiir mey-i muhabbet câmıdır zevk ehline LUTFÎ
Bilenler pek severler cân u dilden feyz-i Mevlâ’yı