Mâye evvel Mustafâ’ya Hâlık’ın ihsânıdır
Cebreil etdi edâ çünkim evvelden cânıdır

Ol dahi bil Hayder-i Kerrâr’a telkîn eyledi
Evliyânın ser-firâzı hem Şîr-i Yezdân’ıdır

Ol dahi bil  Hasan-ı Basrî’ye telkîn eyledi
Zâhir ü bâtını ma’mûr Pîrlerin bürhânıdır

Ol dahi çün Habîb-i Acem’e telkîn eyledi
Anın içün dem be-dem zikretdiği Sübhân’ıdır

Ol dahi bil Hâce-i Dâvud’a telkîn eyledi
Anın içün bî-nişân u lâ-mekân seyrânıdır

Ol dahi bil Seri Sakatî’ye telkîn eyledi
Anın içün kıldı irşâd erdiği ğufrânıdır

Ol dahi Cüneyd-i Muhammed’e telkîn eyledi
Anın içün zikr-i hassü’l-hass ile ol kânidir

Ol dahi bil Hâce Mimşaddin’e telkîn eyledi
Anın içün mâyenin cur’asının mestânıdır

Ol dahi bil Hâce Muhammed’e telkîn eyledi
Anın içün tâ ebed ol âlim-i Rabbânidir

Ol dahi bil anı Vahyüddîn’e telkîn eyledi
Anın içün ilm-i sırdan erdiği deyyânıdır

Ol dahi bil kim Ebu’n-Necîb’e telkîn eyledi
Anın içün iş bu yolda cân ü baş kurbânıdır

Ol dahi bil anı Kutbüddîn’e telkîn eyledi
Anın içün dost yolunda yürüyen erkânıdır

Ol dahi fehm ile Rüknüddîn’e telkîn eyledi
Anın içün aşk ile dost bâğının handânıdır

Ol dahi çünkim Şihabüddîn’e telkîn eyledi
Anın içün bu kurulan ol şâhın meydânıdır

Ol dahi bilkim Cemâlüddîn’e telkîn eyledi
Anın içün irdüği dost zâtının reyhânıdır

Ol dahi Zâhid-i İbrâhim’e telkin eyledi
Anın içün zâhir ü bâtın tarîkat hânıdır

Ol dahi Halvetî Muhammed’e telkîn eyledi
Anın içün zikr ile ol yâre ermek şânıdır

Ol dahi Halvetî Pîr Ömer’e telkîn eyledi
Anın içün küntü kenzin sırrile mihmânıdır

Ol dahi bil Mirem Halvetî’ye telkîn eyledi
Anın çün mazharı dost bâğının bostânıdır

Ol dahi fehmeyle İzzüddin’e telkîn eyledi
Anın içün bu tarîkat sırrının sultânıdır

Ol dahi bil anı Sadrüddin’e telkîn eyledi
Anın içün dürr-i a’zam bahrinin ol kânıdır

Ol dahi bil Seyyid-i Yahyâ’ya telkîn eyledi
Anın içün fahr-i Acem zikrolan irfânıdır

Ol dahi bil kim Pîri Monla’ya telkîn eyledi
Anın içün ilm-i bâtın ilm-i zâhir kânıdır

Ol dahi Tâcüddîn-i Kayser’e telkîn eyledi
Anın içün ilm-i sırrı ilm-i Hak pinhânıdır

Ol dahi Alâüdîn Uşşâk’a telkîn eyledi
Anın içün asrı âlem derdlerin dermânıdır

Ol dahi fehmeyle Şemsüddîn’e telkîn eyledi
Anın içün bu tarîkat ehlinin merdânıdır

Ol dahi Vehhâb-ı Elmalu’ya telkîn eyledi
Anın içün ol Muhammed nûrunun mihmânıdır

Ol dahi bil anı Eroğlu’na telkîn eyledi
Anın içün zâtı Hakk’da erdiği rahmânıdır
Ol dahi bil kim Sinân Ümmî’ye telkîn eyledi
Anın içün kurulan sâdıkların meydânıdır

Cümlesinin rûhuna bin bin tahiyyât ü selâm
Tâlib-i Hakk olana himmetleri erzânidir