Alan sensin veren sensin kılan sen
Ne verdinse odur dahi nemiz var
Hakikat üzre anlayıp bilen sen
Ne verdinse odur dahi nemiz var

Tutan el ve ayak senden gelüpdür
Gören göz ve kulak senden gelüpdür
Efendi dil dudak senden gelüpdür
Ne verdinse odur dahi nemiz var

Hüdâyâ biz bu zâtı kande bulduk
Yâ ef’âl ü sıfâtı kande bulduk
Fenâyı yâ sebâtı kande bulduk
Ne verdinse odur dahi nemiz var

Bizim ahvâlimiz ey Hayy ü Kayyûm
Cenâb-ı pâkine hep cümle ma’lûm
Buyurdun oldu illâ kaldı ma’dûm
Ne verdinse odur dahi nemiz var

HÜDÂYÎ’yi sen eriştir murada
Senindir çünkü hükm arz u semâda
Efendi dahli yok gayrın arada
Ne verdinse odur dahi nemiz var