Cisminin şehrinde mihmândır Pîrim Ümmî Sinan
Gönlümün tahtında sultândır Pîrim Ümmî Sinan

Varlığım cümle hayâtım sıhhatim oldur benim
Cismime cân câna cânândır Pîrim Ümmî Sinan

Nûş edip enfâs-i Kudsün bulmuşuz âb-ı hayât
Çeşmi şol âb-ı hayvândır Pîrim Ümmî Sinan

Aşk gülzârında durmaz mürg-i cân eyler figân
Bâğ-ı cânda verd-i reyhândır Pîrim Ümmî Sinan

Âsumân-ı dilde doğup zulmeti nûr eyledi
Burc-ı cânda şems-i tâbândır Pîrim Ümmî Sinan

Gitmedik râh-i dalâte hamdüli’llah çok şükür
Râh-ı Hakk’da bana bürhândır Pîrim Ümmî Sinan

Mahzen-i esrâr-ı vahdet ma’den-i ilm-i ledün
Tevhîd-i deryâ-yı irfândır Pîrim Ümmî Sinan

Kibriyâ-yı Hızr’a ol mahrem olupdur sırr ile
Zât-ı âla a’zimü’ş-şândır Pîrim Ümmî Sinan

Âsitânın bekleyenler dü cihânda oldı şâd
Bir atâ-bahş sâhib-ihsândır Pîrim Ümmî Sinan

Dopdoludur on sekiz bin âlemin etvârına
Kanda baksam ayn-ı ayândır Pîrim Ümmî Sinan

Âşinâ-yı ezelîdir ruh ana olmaz cüdâ
Yâr-i bâkî vü kadîmândır Pîrim Ümmî Sinan

Kalbimin emrâzına kat kat devâlar eyledi
Der Muhammed derde dermândır Pîrim Ümmî Sinan