Şems ü kamer hayrân olur görse gönül envârını
Âşık ma’şûkun âşikâr dilde görür dîdârını

Mir’ât-ı dil bulsa safâ mey-i hüdâ verse şifâ
Meyhânedir dâr-ı vefâ gör sâkînin devvârını

Dilhâneyi tenvîr eder ekdâr-ı ezmân hep gider
Verir şerâb-ı eynemâ seyret gönül gülzârını

Cânân iline cân gider cânân ile cân zevk eder
Seyr-i cemâli dilberin dilşâd eder nezzârını

Kıyâm-ı serv-i kāmetin alâmeti kıyâmetin
Âşıkları raksa salar gör gülberin etvârını

Şems-i şerâfet ruhleri mihr ü mâhe vermiş zıyâ
Dürdâne-veş nûr halları gerdende gör ızhârını

Zülf-i siyeh ebrû-kemân bir tâze gül-nevreste şân
Vermiş cihâna LUTFİYA kaldır gözün astârını