Cânâna cândan ‘âşık ol kim cânda cânân gizlidür
Ma’şûkunı kalbünde bul ol hânede hân gizlidür

Bir pîr-i kâmil bul çalış nâ-puhtesin aşk ile piş
Gayb-ı’amâya pek yapış çün sırr-ı insân gizlidür

Bilsen hezârun zârı ne ‘âşık fenâ gülzârı ne
Yansan Halîl’ün nârına anda gülistân gizlidür

Bendinde kalma kesretün kulı ol ehl-i vahdetün
Destinde pîr-i halvetün mühr-i Süleymân gizlidür

Varsan bu aşkın Tûr’ına irsen tecelli nûrına
Her zerresinde görine mihr-i dirahşân gizlidür

Yüzine bakma gâfilün pâyına yüz sür vâsılun
Kalbine girüp kâmilün gör ‘Arş-ı Rahmân gizlidür

Sana ‘inâyet kılsa Hak Nuri’den okısan sebak
‘İlm-i ledündür her varak insânda ol şân gizlidür