Derdin ne behey ‘âşık bîçâre neden oldun
Bir yerde karârın yok âvâre neden oldun

Dokunmadı çün sana tîr-i müjeni yârin
Ey sîne-i mecrûhum pür-yâre neden oldun

Bir gonca sevip ey dil hâr-ı gama mı düşdün
Gül gibi bu gülşende sad-pâre neden oldun

Ol mihr-i cihân-ârâ oldu mu gözünden dûr
Ey gözlerimin yaşı seyyâle neden oldun

Gördün mü yüzün yârin evsâfın işitdin mi
Tâ sen bu kadar ‘âşık dîdâre neden oldun

Pâmâl-i mehabbetsin yokdur başına çâre
Çün bu kadar ey Şemsî pür-yâre neden oldun