Gel beru ey gül gibi kendini izhâr eyleyen
‘Âşık- ı sâdıkları bülbül gibi zâr eyleyen

Cilve-gâh-ı nûr-ı zât idüp ser-â-ser ‘âlemi
Kâ’inâtı mazhar-ı ‘ışk eyleyüp vâr eyleyen

Lâ-mekân milkinde kurup haymesin ‘âşıklarun
Bunca vüs’atle cihânı anlara dar eyleyen

Geydürüp ehl-i fenâ-yı zâta Hakkânî vücûd
Bu vücûd-ı fâni’i almakda bâzâr eyleyen

Gözleyüp nâr-ı celâlinde cemâli nûrını
Ey Halîl’e âteş-i Nemrûd’ı gülzâr eyleyen

Hakkı-i bî-çâreye vaslundan özge yok ümid
Ey dem-â-dem ‘ışk-ı pâkine dili yâr eyleyen