Kime varub yalvarayım kapunı koyub ey Hudâ
Bir bende-i bî-çâreyim boynum eğüb geldim sana

Destim tehî yüzüm siyâh geldim sana ey pâdişâh
Dâ’im işim efgân ü âh ol dest-gîr lutf et bana

Girdâb-ı hicre düşmişem şevkın odına pişmişem
Al destimi ki şaşmışam sen derdime eyle devâ

Sana benim hâlim ayân lâzım değil itmek beyân
Sensin mu’în ü müste’ân avn eyle gel bana şehâ

Nefsin uyub sevdâsına taldım günâh deryâsına
Eyle ilâc dil pâsına kılma beni senden cüdâ

Hîç sana kulluk etmedim buyurdığını tutmadım
Râh-ı rızâya gitmedim oldı kamu ömrüm hebâ

Aşk-ı mecâzdan geçmedim hamr-i hakîkî içmedim
Yahşı yamanı seçmedim etdim hevâya iktidâ

Dostun Muhammed hakkiçün koyma bizi zâr u zebûn
Kudret yedinle câmı sun çıksun gönülden mâsivâ

Yok nideyim kâmil delîl kaldım yetîm oldum zelil
Gönlüm hazîn cismim alîl bu renclere virgil şifâ

Ey sâhib-i fazl-u kerem Kuddûsîye vir câm-ı Cem
Artsun safâsı dem-be-dem ana gerekmez mâ’adâ