Şem’-i rûhuna cismimi pervâne düşürdüm
Evrâk-ı dili âteş-i sûzâne düşürdüm
Bir katre iken kendimi ‘ummâne düşürdüm
Hayfâ yolumu vâdî-i hicrâne düşürdüm
Takrîr edemem derd-i derûnum elemim var
Mevlâ’yı seversen beni söyletme gamım var
****
Dinle sözümü sana direm özge edâdır
Dervîş olana lâzım olan ‘aşk-ı Hudâ’dır
‘Âşıkın nesi vâr ise ma’şûka fedâdır
Semâ’ safâ câna şifâ rûha gıdâdır
****
Ey sôfî bizim sohbetimiz câna şifâdır
Bir cur’amızı nûş idegör derde devâdır
Hakk ile ezel etdiğimiz ‘ahde vefâdır
Semâ’ safâ câna şifâ rûha gıdâdır
****
‘Aşk ile gelin eyleyelim zevk u safâyı
Göklere değin irgörelim “Hû” ile “Hayy”ı
Mestâne olup depredelim çeng ile nâyı
Semâ’ safâ câna şifâ rûha gıdâdır
****
‘Aşk ile gelin tâlib-i cûyende olalım
Zevk ile safâlar sürelim zinde olalım
Hazret-i Mevlânâ’ya gelin bende olalım
Semâ’ safâ câna şifâ rûha gıdâdır