Dilâ zâtında buldunsa Hudâ’yı
İşidüp bilesin sen her sadâyı

Halâs olduysa özün mâsivâdan
Muzırr olmaz eğer giysen kabâyı

Derûnun olıcak zerle müzeyyen
Ne nef’ eyler sana giymek abâyı

Umarsan her bir âfetden selâmet
Gelüp gir içerü gezme dolayı

Ne hâsıl eylesin fikr-i ‘imâret
Harâb üzre yapıldı ten sarâyı

Ve ger rûhun dilersen kim uyansın
Kalîl it nefsine her bir gıdâyı

Gönül sultân-ı a’zâ-yı ceseddir
O dem bulur henüz genc-i gınâyı

Çalış ‘aşk ile yansın hâr u hâşâk
Süyûf-ı zihn ala andan cilâyı

Bana ta’lîm iden kimdir di Gurbî
Sana bu denlü tâ hüsn-i edâyı